Er þitt fyrirtæki næsta sprengistjarna?

Startup SuperNova er samstarfsverkefni KLAK - Icelandic Startups, Nova og Huawei með stuðningi frá Grósku og er einn mest spennandi viðskiptahraðall landsins.

Í hraðlinum er leitast við að byggja upp hagnaðardrifnar tæknilausnir sem hafa burði til að keppa á alþjóðamarkaði. Árlega eru tíu frumkvöðlateymi valin til þátttöku í sex vikna viðskiptahraðli sem hefst strax eftir verslunarmannahelgi. Teymin fá fræðslu og þjálfun við þróun viðskiptahugmynda sinna og aðgang að fjölda sérfræðinga. Allir þátttakendur í Startup SuperNova fá stuðning frá metnaðarfullri mentoraþjónustu KLAK VMS.

Reglulegir viðburðir eru í boði þar sem teymum gefst enn frekari tækifæri til að koma sér á framfæri og efla tengslanetið. Hraðlinum lýkur með opnum viðburði þar sem þátttakendur kynna lausnir sínar fyrir fjárfestum og lykilaðilum í íslensku atvinnulífi og uppskeruhátíð sprotasamfélagsins síðar sama dag.

Startup SuperNova byggir á alþjóðlega sannreyndri aðferðafræði og áralangri reynslu KLAK af stuðningi við frumkvöðla og sprotafyrirtæki. KLAK hefur til fjölda ára veitt aðstoð við þróun viðskiptahugmynda og leitt saman hóp hagaðila með verðmætasköpun að leiðarljósi. Félagið aðstoðar sprotafyrirtæki að vaxa innanlands og út fyrir landsteinana með því að hraða þróun þeirra og tengja þau við sérfræðinga, fjárfesta og aðra lykilaðila. KLAK hefur skipað sér sess sem lykilaðili í stuðningsumhverfi nýsköpunar á Íslandi og leggur sig fram við að vera leiðandi afl í grasrót frumkvöðlasamfélagsins.